紓困猶領無.貸款也借無 健身業望政府協助

三級警戒期間，民眾無法度去健身房運動。就有業者今仔日佮立委做伙開記者會，講In毋但申請紓困補助有問題，連欲借紓困貸款，銀行也毋借。希望政府鬥出手、協助度過難關。

疫情滾絞健身產業變慘業，有業者出面講，予停業佮厝租逼甲接載袂牢，想欲請體育事業紓困補助，閣卡佇愛提出疫情期間的營收證明表，但是這項報表是兩個月結算一改，愛到7月中才提有，這馬也袂當領。

立法委員 何志偉 & 北市健身教練職業工會理事長 呂宇晟:「因為IN要求上新的五六月401報表，彼通常上新的報表，是以兩個月做一个單位做一擺按呢。(所以恁收入報表啥物時陣才出來) 七月十五
。」

予業者心煩的代誌，閣有欲向銀行申請紓困貸款4.0，也予評估講是高風險產業、仝款因為無上新的營收證明表受著拒絕，連欲借錢過日攏無法度，立委也提出建議，希望政府通放冗貸款條件。

立法委員何志偉:「民眾會當檢附切結書，檢附切結書，就予in會當進行貸款，這个切結書真濟人講敢會有造假等等。莫因為一兩个人，就共規个產業攏刜予死。」

針對業者申請營業收入報表的困難，教育部體育署是表示，有開放予業者先申請紓困補助才交件，貸款部份會聯絡金管會了解，全力協助業者，另外針對一寡無勞健保、無工會教練的紓困案，上新統計有受理六千外件，也當咧審查，會盡速放款。