嘉義市擋疫情 22台電動公車減車幫.鬥酒精機

嘉義市政府,為著欲加強大眾運輸的防疫安全,交通處7/26共市區3條路線,攏總有22台電動公車,安酒精自動噴霧器,也有減少假日時仔的車幫,做伙來對抗疫情。

上公車進前,手會當先來噴酒精,閣加上原本的空氣殺菌設備,嘉義市政府希望佇疫情這段時間,予有需要坐公車的民眾會當較安心。

嘉義市交通處長鄭君健講,「佇車門的附近就會當做清潔消毒的工課,阮想講這部份對民眾自身的安全,閣有乘客的安全,攏有相當的幫助。」

嘉義市政府交通處昨日佇市區3條路線,22台電動公車的出入口邊仔,攏裝設酒精自動噴霧設備,方便民眾消毒手。但是因為增加消毒的動作,所以民眾上車落車的時間會拖較長,交通處嘛請駕駛開車進前愛注意。

嘉義市交通處長鄭君健表示,「民眾用消毒的酒精了後,駕駛會等乘客坐好了後才來駛車,袂講恁閣咧消毒的時陣,猶未坐好進前,阮駕駛就來駛車,袂。」

目前疫情三級警戒,民眾減少無必要的出門,嘉義市的公車佇假日的時陣,嘛配合減少車次。業者呼籲欲坐大眾運輸工具,毋但愛配合防疫措施,如果有發燒、咳嗽的症頭,請毋通來坐車,以免造成傳染的風險。

全台敬老金大調查

相關新聞