竹北民代提案1人發1萬 市長:財政無法度負擔

看著真濟民眾的經濟、受著疫情衝擊,新竹縣、竹北市民代表會就提案建議、愛發予竹北市民、每一个人、1萬箍現金。毋過竹北市長表示,一人一萬、總共愛開20億,財政無法度負擔。


因為中央的紓困方案有條件限制,真濟民眾資格無符合,無法度提出申請,但是疫情關係各行各業攏受著真大的衝擊,竹北市民代表會規氣提出建議案,希望公所針對竹北市民一人發一萬箍。

竹北市民:「贊成啊,因為逐家生活真困難,生理嘛僫做,啥物攏定去欲按怎做。」也有民眾感覺發1萬箍無意義,竹北市民:「毋免啦,發一萬箍無啥物意義。」

竹北市代會主席林啟賢:「地方上聽著基層的風聲,會使講逐家真歹過,財政會得過的情形之下,希望廣發一萬箍予竹北市民得著紓困的現金,予in的生活會使有淡薄仔補助。」

針對提案,竹北市長回應,雖然講市庫有40外億,若是一人一萬總共就需要20外億,閣加上目前有工程當咧進行攏需要錢,恐驚會影響市公所的財政。

竹北市長何淦銘:「市公所因為是縣轄市,事實上財政是無法度來應付,平常時針對急難救助抑是社會福利,市公所攏有做,民眾若是有需求會使提出來,市公所會看狀況補助適合的金額。」

目前這項建議案,代表會已經提交予市公所,代表會表示,會當看是欲增加排富條款,抑是只針對受影響的產業進行發放,紲落來攏會閣進行討論。

全台敬老金大調查

相關新聞