屏東圖書館共冊免費寄到厝 免出外就通閱讀

疫情期間,全國圖書館攏暫停開放,屏東縣立圖書館推出新的服務,圖書館會揀冊,而且免費寄去民眾厝裡,300个名額,2點鐘就予注文了了,因為傷過受歡迎,這馬縣內鄉鎮市的圖書館,嘛按算欲推出仝款的服務。

屏東縣立圖書館總館的人員,無閒咧揀冊,揀好的冊每一本攏愛先消毒,才囥入紙箱內底,這就是圖書館最近推出的服務,規箱的冊會免費寄到民眾厝裡,予民眾踮厝內防疫有冊通看。
 
屏東縣文化處長吳明榮:「阮其實咧思考按怎予圖書館,雖然閉館也有圖書館的功能,我企劃有三百箱的閱讀驚喜箱,阮非常驚疑因為佇兩點鐘內,就全部登記完成。」

因為名額只有300个,圖書館嘛想袂到遮受歡迎,這个閱讀驚喜箱,一箱差不多有9本至12本冊,攏是這兩冬內出版的,圖書館會根據申請的民眾較佮意什麼冊,閣會推薦防疫期間上適合的冊,這禮拜陸續就會寄到民眾厝內。
 
屏東縣文化處科員林怡如:「親子教養、囡仔冊、青少年的書籍,閣有其他生活風格,推理小說以及西醫、生活保健,遮攏是民眾佮意的。」

毋但總館,屏東目前有21个鄉鎮的圖書館,後禮拜嘛欲推出仝款的服務,另外台南市45位圖書館,最近嘛有線頂借冊,民眾家己來提抑是寄到厝內的服務,攏是希望民眾踮厝內防疫,嘛會當享受閱讀。

相關新聞

專題|全台敬老金大調查