各地傳死亡案例 嘉義75-82歲注射意願受影響

嘉義從13開始,安排第1至第3類的民眾注疫苗到今,傳出有部份老大人,因為注疫苗的不良反應過身,20早起,嘉義市繼續開放75-82歲的民眾注疫苗。市府講,確實有一寡民眾因為驚有不良反應,到這馬猶咧躊躇敢欲去注射。

袂少民眾一早仔就來到指定的所在,準備欲來接種疫苗,嘉義市佇今仔日開放75至82歲的民眾來注射。針對最近因為注射產生的意外,來的民眾猶是表示,有注射較安心。
 
接種長輩葉女士:「阮遐無人敢來注,干焦我上勇敢。(你哪敢閣來注 別人攏毋敢),咱作生意佇外口,人in攏佇內底,較無要緊。」
 
陪同家屬蔡小姐:「(這馬因為有不良反應 會煩惱無) ,無啥會啦,主要是看阮爸,伊心理建設誠充足,所以較無問題。」
 
這過中央分配4600筒疫苗,予嘉義市75至82歲的人來注。市府統計,第二波會當注的人,大約有1萬2千外人,目前預約欲注射的民眾有2800人,市府嘛表示,民眾注射的意願,確實有受著不良反應的影響。
 
嘉義市長黃敏惠:「我想毋但咱咧躊躇,家屬嘛誠躊躇,阮問過的攏是,但是阮嘛是量講利大於弊,對這改的防疫工課,咱清清楚楚攏知影接種疫苗是防疫上重要的代誌。」
 
陪同家屬沈先生:「這生成一定愛注,不良反應是家己要控制予好,像頭拄仔阮媽媽伊猶未注,伊就講伊的頭殼小可仔眩眩,彼是伊家己緊張,注了以後反應袂䆀。」
 
因為驚注射的不良反應,第二波來注的人數,無拄開始遐爾濟,但是對20早時到中晝,嘛已經有千外人來注過。黃敏惠表示,疫苗不夠的問題需要解決,感謝美國送的疫苗,嘛希望中央會當趕緊分配,提懸地方疫苗的接種率。

九合一選戰解析

相關新聞