新竹湖口水道水摻汽油味 疑因工程收尾無周至
張君豪 / 新竹報導
發布時間：
更新時間：
新竹湖口這兩工，有40外戶民眾厝內的水道水，毋但黃黃，閣有汽油味，真濟民眾，只好去買水來啉，自來水公司表示，可能是進前的工程造成的，會趕緊來改善，也會來協調賠償。
水塔內底的水黃黃，而且敢若有一層油浮佇頂懸，民眾發現新竹縣湖口部份地區，這兩工的自來水毋但看起來真垃圾，鼻起來閣有真重的汽油味。
經過反映，自來水公司嘛已經派人來到現場勘查，初步了解是因為17彼工，水公司附近有進行工程，有可能是上尾洗管無細膩的關係，才造成這款狀況，會負起相關責任。
自來水公司講這改受影響的，大概差不多40戶，目前建議民眾先共水道頭拍開，予水流掉一部份了後，才開始使用，紲落會聯絡受影響的用戶進行協調。
水塔內底的水黃黃，而且敢若有一層油浮佇頂懸，民眾發現新竹縣湖口部份地區，這兩工的自來水毋但看起來真垃圾，鼻起來閣有真重的汽油味。
民眾:「水的味鼻起來就是汽油味真重，色水用目睭看起來，水塔內底的感覺，就是敢若透薄過的汽油彼種色水，規桶看起來攏是按呢，味是有夠鑿鼻，厝內底嘛攏是汽油味。」
自來水三區管理處副處長謝東穎:「洗管水本來就是排掉，毋過這改有發現有可能有部份少量的水，因為開關閥無關絚，予水入去支管，造成這改民眾反映的事件，部份民眾認為有造成損失的部份，台水公司會參民眾做認定佮紲落來的協商。」
專題｜改造地獄路 台灣行人路為何難行？
