圖書館捒線頂借冊 民眾佇厝防疫也有冊通看

台灣進入新冠肺炎疫情的三級警戒了後,各大圖書館、冊店,為著配合防疫也攏暫停開放,為著滿足民眾閱讀的需求,圖書館參濟濟平台捒出電子冊提供民眾借閱,國立公共資訊圖書館表示,今年5月借冊的數量和舊年5月相比,成長70%。

因應新冠肺炎的三級警戒,各圖書館、平台攏捒出電子冊借閱服務,國立公共資訊圖書館佇這段期間,嘛針對防疫踮佇厝內的民眾,提供相關的線頂資源。
 
國資圖數位資源服務科長廖禎婉:「民眾踮佇厝防疫就是逐工愛煮,每頓攏愛煮的時陣,所以阮就會推廣予in佇厝會當隨時看的食譜,或者是佮食健康方面相關的冊,另外就是講佇厝內嘛會當運動,相關系列的電子冊的推廣。」

國立公共資訊圖書館表示,今年 (110) 1月到5月和舊年仝期相比,電子冊借閱數量,成長45.5%、借閱人次成長52.7%,其中5月的電子冊借閱數量,比舊年5月,增加70%;另外電子冊出版社也有明顯的變化。
 
崧博出版社社長黃榮華:「最近這幾個月來講,電子冊顛倒是量會變大,逐家攏共較早做過的冊,提出來做電子冊,較心適的變化就是講,佇咧學生高三、國三拄好考煞,拄好開始發生疫情,看排行版攏是尪仔冊、小說、寫真集,佔據電子冊的排行榜。」

這幾冬因為閱讀形態改變,加上疫情影響,電子冊有愈來愈受歡迎的趨勢,各大圖書館、閱讀平台除了電子冊,也有電子雜誌、電子報紙、線頂資料庫、影音平台等等的資源,提供借閱,希望疫情期間,民眾佇厝內猶是會當享受多元的閱讀體驗,滿足閱讀的需求。

相關新聞

專題|全台敬老金大調查