嘉義東石煏超商店員確診 社區篩檢279人陰性

嘉義東石,6/15出現便利店員工確診的個案,6/16下晡進行社區篩檢,昨昏接受PCR檢測的有88人,快篩檢查191人。縣政府表示,已經透過實聯制的資料,通知有接觸史的民眾來檢查。

接到通知的民眾,攏來到衛生所外口,準備接受檢查。嘉義縣東石鄉15傳出有超商店員確診的消息,因為個案逐工去的所在攏真單純,所以感染的原因閣咧調查,鄉公所除了全鄉消毒,嘛佇16下晡進行社區篩檢。
 
嘉義縣東石鄉長林佳瑩:「當然這是箍列確診者的厝邊隔壁,其實就是予逐家一個檢驗,比較安心,然後嘛希望逐家莫傷過驚惶。」

縣政府調查超商實名制的資料,嘛針對個案徛家佮上班會接觸的人,總共發出1500外筆的簡訊,昨昏下晡就檢查了279人,今仔日早時結果出來,全部攏是無感染的陰性。
 
嘉義縣長翁章梁:「昨昏檢查出來的結果全部是陰性,就是逐家攏無代誌,所以阮希望透過擴大的篩檢閣有快篩,會當揣著可能的感染者。」

嘉義縣衛生局表示,這間超商外地遊客較濟,所以呼籲接著通知的民眾,一定愛去做檢查,若有相關的症頭,嘛愛趕緊通知相關單位,千萬毋通因為無注意,造成疫情的傳播。

相關新聞