金曲歌手寫母語抗疫歌 醫護.警消合唱擋疫情

新竹縣政府為著鼓舞人心,邀請客語歌手合作寫一首對抗疫情的歌曲,嘛邀請前線的防疫人員做伙合唱。

新竹縣政府參金曲客語創作者 邱廉欽合作的防疫影片,特別邀請醫護、警察、消防等等人員做伙合唱,希望用溫暖的歌聲 來撫慰人心,嘛感謝辛苦的第一線防疫人員。
 
醫師賴文紹:「盡心力替防疫人員加油,歌詞內底有講著,這是一片有福氣的土地,猶毋過受著新冠肺炎的摧殘,逐家只要一條心來抗疫情,其實一定回歸正常生活。」

製作歌曲的過程中,嘛發生真濟趣味的代誌,醫生講唱歌感覺比家己看診 閣較困難,因為是第一改入去錄音室,無經驗難免會緊張。
 
醫師賴文紹:「人生中第一改入去錄音室,真正有緊張,猶毋過看著第一線醫護人員,閣有防疫人員堅守崗位,其實逐家攏是一條心來防疫,心肝內就會有一種熱情。」
 
新竹縣長楊文科:「上主要的是鼓勵人心,予每一个人攏會使感覺咱是堅強做伙來抗疫,明仔載會更加好。」
 
這條抗疫歌結合傳統佮現代的風格,歌詞有客語、台語以及原住民的元素,表達團結的決心,嘛感謝防疫人員的堅定信念。

全台敬老金大調查

相關新聞