嘉義縣9000外位85歲以上序大 今日開始注疫苗

全台灣各縣市佇6/15這工,開始共老大人注預防射,嘉義縣85歲以上的序大衛生單位有列名單,總共有九千外人登記。嘉義市的部分,因為85歲以上的老大人無到5千人,進也放冗到83歲,有3千7百外人登記。

醫護人員tshuā已經注射了的序大離開,另外一爿,醫生嘛無閒咧替欲注射的序大評估身體狀況,今仔日嘉義縣市序大注疫苗,下早仔開始,各地接種站攏有誠濟序大來現場準備。
 
陪同家屬 周小姐:「出去嘛毋知影會拄著啥物,如果有注射,加一層保障。」
 
陪同家屬 黃小姐:「這馬嘛是閣有確診的人,in來注疫苗嘛是閣確診,而且伊干焦注一筒猶是袂放心,因為這當中會發生啥物,無人會知影。」
 
嘉義市提供4500筒疫苗,予85歲以上的序大來注,但是因為市內85歲以上的人數無遐爾濟,所以修正到83歲,總共有3700外人來登記,嘉義縣登記欲注的有9千外人,為著減少等待的時間,醫護人員現場搬徒設備來服務序大。
 
嘉義縣長 翁章梁:「有一寡無佇嘉義縣設籍,但是蹛佇嘉義縣的序大,阮嘛允准in來注,閣有一寡臨時,原本講無愛注,後來閣改欲注的,阮佇疫苗量有夠的狀況之下,嘛是會接受逐家會當來注疫苗。」
 
陪同家屬 厲小姐:「是予in注注咧,感覺較安心。」
 
嘉義市為著鼓勵序大出門注疫苗,有補助車資請計程車來接送,嘉義縣針對一寡蹛較偏遠猶閣有行動不便的序大,嘛有到厝注射的服務,希望透過群體注疫苗的保護,降低疫情的傳播。

全台敬老金大調查

相關新聞