高雄外籍漁工檢疫加嚴 規船篩檢送防疫旅館
陳嘉筠 賴威佐 / 高雄報導
發布時間：
更新時間：
高雄前鎮漁港，對6/15開始一直到八月底，會有100外隻走遠洋的漁船轉來靠岸，按算有4千8百外个漁工入港，這馬外籍漁工入港的檢疫變真嚴格，著愛規船篩檢。若是佮其他船隻抑是佮港口有接觸，全部漁工落船就愛去隔離旅館居家檢疫。
漁船靠岸，外籍漁工捾著家己的行李，一个一个排隊安檢入關。簡單疫調了後，in著愛坐防疫巴士，去蹛市府安排的防疫旅館，因為這馬台灣疫情期間，對遠洋漁船檢疫變較嚴。
漁船靠岸，外籍漁工捾著家己的行李，一个一个排隊安檢入關。簡單疫調了後，in著愛坐防疫巴士，去蹛市府安排的防疫旅館，因為這馬台灣疫情期間，對遠洋漁船檢疫變較嚴。
高雄市副市長林欽榮表示:「原船無可能超過八个人，一人一室留佇船頂，其他的有防疫巴士送到阮揣的三千外个一人一室的防疫旅館，就地居家檢疫十四加三工。」
前鎮漁港是台灣上大的遠洋漁港，15這工第一批魷魚漁船轉來的有6隻，攏總293人會入港。市府派出百外人佇港邊，愛漁船分批、分流配合檢疫，一直到八月底，按算會有百外隻船，四千八百外人入港，除了有海上運補抑是別位港口的接觸史，愛居家檢疫，若無接觸史，嘛著全部篩檢。船主認為，遠洋漁船的人員其實顛倒較安全。
穩發漁業董事長謝龍隱:「船員舊年年底就去大西洋，已經佇海上半冬外，阮顛倒入來，這馬因為島內疫情驚去人佮人接觸，共疫情tshuā去船頂。」
安排漁工蹛防疫旅館，政府每工補助一人一千五百箍，毋過這馬因為防疫較嚴，漁工上船意願嘛變低，成本提懸，船主猶是配合政策。另外，市府嘛逐工派警察佇漁港，管制人員，嚴格防疫。
