香港反送中滿2冬 民團呼籲政府助港.拒絕中資

香港反送中運動佇6/9滿2冬，幾若个台灣民間團體參立委，做伙舉辦「台灣同行、連儂再現」的線頂記者會，呼籲臺灣政府愛有聲援香港的制度，也愛看加強香港資金入來臺灣的審查。

香港青年上街頭抗議中國的反送中運動，佇中國迫害之下，超過萬外位抗爭者予掠、600外人予定罪，中國甚至用香港版的國安法，羅織真濟人成做政治犯，反送中到今，已經滿兩冬。
  流亡海外的香港民主運動領袖也透過線頂，呼籲台灣佮國際社會愛仝濟抵抗中國，也有公民團體呼籲政府應該愛正視紅色港資的問題，強化審查規範，明定港資適用外資規定的前提要件。
  江旻諺提醒，若有港資結合中資以外資身份買上市、上櫃股票，就有機會提著重要的國家產業經營權，應該愛堤防。另外8月初一開始，香港入境條例就生效，台灣人權促進會也呼籲立法院應該參考聲援緬甸的抗爭決議文，針對香港修入境條例做表態，參與線頂討論的立委是表示，會推動港澳條例修法，或者是馬格尼茨基法案，對違反人權做制裁。