竹北換細支注射筒 1790份疫苗閣加注165人

這陣疫苗數量有限無夠分,每一筒攏真寶貴。新竹竹北衛生所的護理師,為著無想欲浪費任何一滴藥劑,共注射筒換做細支的,原本干焦會使注1790人的疫苗,進是加注165位醫護人員。

護理人員專心抽疫苗藥劑,準備替另外一位醫護人員注射。這陣因為疫苗數量有限,每一劑攏真寶貴,竹北衛生所特別共原本的注射筒換做較細枝的1cc的空針,用閣較精準掌握劑量的方式,來把握任何一滴藥劑。
 
新竹縣竹北市衛生所護理長蔡慧芳:「3cc空針因為刻度較大,所以真僫掌握精細的劑量,難免就會浪費掉這个1cc空針,相對刻度就較細,抽的時陣,較袂佇注射筒內底有空氣,避免真濟藥劑浪費的狀況。」
 
這改衛生所總共領著1790劑疫苗,最後注了1955人,比原本加注165人。雖然有人煩惱敢會因為按呢,藥劑量無夠額,衛生局解說,一罐AZ疫苗有6cc,每一个人需要注0.5cc,所以一罐會使注10~12人的量。改用1cc空針袂去影響著有效的劑量。
 
竹北市衛生所護理長蔡慧芳:「一罐明明就會使注11人,就莫去浪費,因為欲提著實在真無簡單。」

面對疫情,醫護人員想盡辦法,想欲共疫苗發揮上大的效益,予閣較濟的人會使較早注著疫苗。

全台敬老金大調查

相關新聞