驚無畢業典禮成做學生遺憾 學校出步創造回憶

受疫情影響,今年高雄市大部份的學校,攏取消畢業典禮,毋過猶是有百外間學校,規模縮小,抑是改做線頂。今年有學校就利用古錐的機器人,代替畢業生參加畢業典禮,嘛有學校提早製作畢業影片,代替畢業典禮,予學生一个無仝的回憶。

老師佇畢業典禮致詞,對面毋是學生,是一个一个的機械人,每一个機械人攏有名,伊的面,會當看著囡仔的笑容,今年曹公國小28个畢業生,就是踮厝內透過機械人,參加in的線頂畢業典禮。
 
曹公國小教務主任李政興:「凱比機械人本身就有攝影機,嘛會當看著現場畫面,阮透過這个,學生就會當融入現場的環境,比較會當體會著畢業典禮的感覺。」

因為拄著疫情,曹公國小才想著學校有7台古錐的機械人,會當代替畢業生參加典禮,校長閣四界去佮別的學校參詳,才借著攏總28台,透過機械人影像,學生毋但會當看著老師,閣有互動,仝一工舉辦線頂畢業典禮的,閣有左營國中。

那看影片,學生徛予正行禮,就親像家己受獎,左營國中今年六百外个畢業生,攏是佇線頂參加畢業典禮,學校對三級警戒彼工,就開始籌備這塊影片,老師無閒二禮拜才完成,一點鐘的畢業影片,雖然人踮佇厝內,猶是有學生穿校服參加。
 
左營國中校長蔡智文:「這斗線頂典禮足濟資料,因為防疫問題袂當全部集中,所以愛一个一个人叫來錄,錄以後閣愛拍字,這馬集做伙配音樂,所以比真正的畢業典禮實在是加足麻煩。」
 
左營國中的老師嘛利用停課,佇門口畫這个3D地景圖,向望疫情過去,畢業生會當轉來學校拍卡翕相。

今年高雄市有123間學校,改辦線頂畢業典禮,有六成學校取消,阿蓮國小雖然取消典禮,毋過老師佮學生做伙鬥圖,共165位畢業生的笑容,鬥成一張大型畢業相片,嘛是學生佇疫情中難忘的回憶。

全台敬老金大調查

相關新聞