為防疫暫停長輩照顧據點 到厝送餐需求大增加

嘉義老人人口袂少,毋過這馬受著疫情影響,所有服務中心攏暫停開放,致使袂少濟歲人,送飯菜去厝裡的需求,嘛綴咧增加。

直播的時間到矣,照顧者用手機仔來放送直播影片予序大看,影片的內容除了教老大人,嘛有一寡課程提供予家庭照顧者,教按怎排解老大人因為無法度出門的鬱卒,減輕照顧者的壓力。
 
家庭照顧者林先生:「佇厝內定定咧睏,無代誌就愛睏,所以去據點彼加減差太濟,這馬佇厝視訊時,阮會當加減用予看,加減有用,對伊幫助誠濟。」
 
嘉義縣居家服務中心主任林月娥:「攏是希望會當繼續,維持序大in原本的身體功能,嘛予in透過遮的訓練會當閣揣轉來,in佇日照中心生活的步調。」
 
服務中心表示,這陣受疫情影響據點暫停開放,除了老大人沒所在通去,過去需要佇據點食飯的老人,這馬更加需要送餐志工的服務,而且佇疫情期間,遮的志工除了送餐,嘛愛隨時注意老人的狀況。
 
民眾董先生:「加誠方便,若無,跤按呢也無法度出去買。」
 
送餐志工蕭小姐:「會問阿伯你閣有去看醫生無,你身體的狀況按怎,就是問in身體的狀況。」

服務中心強調,因為疫情的關係,這段時間居家送餐的需求有咧增加,但是送餐的志工煞無法度照長照人員的條件來注疫苗,嘛希望相關單位會當協助處理,保護遮的志工,維持長照系統的運作。

九合一選戰解析

相關新聞