竹科第一座科學園區篩檢站 予員工.眷屬就近驗

為著避免疫情對產業造成衝擊,全臺第一座,科學園區篩檢站,初3佇新竹成立,就是希望予竹科的員工佮家屬通好來做篩檢,而且快篩、核酸檢測兩種攏有。

總產值超過台票 1.2兆的新竹科學園區,面對疫情每一間廠商攏嚴格控制公司人員的出入。為著加強園區防疫,初三閣成立全台灣第一座園區篩檢站,未來會使就近替園區從業人員做篩檢。
 
聯電榮譽副董事長宣明智:「按怎保障家己,保障厝內的人,保障公司攏是咱共同的願望,所以今仔日有這个篩檢站,是園區廠商員工的福音。」
 
雖然講比並全國的疫情,新竹算講較無遐嚴重,猶毋過市長林智堅強調,一定愛配合防疫工作,才會使共度難關。

目前篩檢站一工會使提供80至100件的篩檢量,若是發現民眾快篩結果是陽性,會連鞭進行PCR篩檢佮血氧量測,守護台灣科技產業。

全台敬老金大調查

相關新聞