新北1公司員工確診 外籍接觸者煞著照常上班

新北市中和有一間光電業者,5/29出現一个確診者,毋過煞有員工指控講,公司干焦隔離臺灣籍的接觸者,煞無安排外籍接觸者去做篩檢。公司是掰會講,是已經有安排接觸者,自主健康管理矣。

新北市中和一間光電公司,5月29出現一位新冠肺炎的確診患者,毋過煞有消息指出,這間公司一開始干焦隔離台灣籍的接觸者,煞無安排外籍的接觸者去篩檢、或者是隔離,真濟移工只好家己去篩檢。
 
無徛名的光電公司工人:「伊的朋友台灣人去檢查結果是陰性,In嘛無去上班 愛隔離,但是越南妹妹無隔離。」

公司是證實有確診者,嘛證實干焦隔離台灣人,毋過是掰會,干焦隔離台灣籍的員工,是因為台灣籍的接觸者較捷佮確診者接觸,外籍的接觸者接觸較少,所以就維持in自主健康管理、照常上班,但是有密切關注外籍接觸者的健康狀況。
 
無徛名的光電公司工人:「In攏佮阮仝一个房間,無隔離嘛無做啥,每个房間無仝款,六七个到八个人一个房間,越南人真濟,百外人。」
 
工人表示,in佮公司申請,希望會使集體佇宿舍隔離14工,嘛有90幾个人佇申請書頂懸簽名聯署,公司是向記者表示,一擺歇遐爾濟人、對公司的影響是真大。因為疫情的關係、無適合群聚,公司講,希望工人in派幾个代表來佮公司討論,解決這个問題。

九合一選舉指南

相關新聞