為防疫禁人客佇店內食食 餐飲營業模式大改變

為著降低新冠肺炎傳染的機率,這站仔政府規定賣食的店頭,禁止佇店內底食物件,干焦會當紮走,傳統小食擔仔人客變真少,毋過是本底就以外送為主的店頭,生理就無啥受著影響。

店頭家無閒準備食材,這攏是人客預訂的飯包。這陣國內新冠肺炎的本土疫情嚴重,民眾除了選擇家己煮,無就是訂外送。
 
餐飲業者李元灝:「店內食基本上攏無,但是阮這馬包的量較濟,傳統小食擔仔攏較靠行入店內的人客,所以真正有差,外送佮包轉厝內較無影響。」
 
為著防疫,店家也將取餐的地點徙到門口,嘛盡量請人客錢攢拄好,減少找錢時的接觸風險。
 
餐飲業者李元灝:「儘量請人客幫阮用塑膠袋仔裝入去,阮嘛會先噴酒精,像現金我嘛會噴酒精。」
 
酒精、喙罨、甚至掛防護的目鏡,店頭自發性做好自我保護,這站仔國內疫情嚴重,政府也規定無論超市、超商、大賣場參飲食店,全部暫停內底時食的服務。
 
彰化縣長王惠美:「阮全部愛請民眾用包的,禁止透過食的過程,共喙罨遛落來造成群聚,引起無必要的傳染。」

餐飲業者配合防疫措施,做出營業調整,傳統小食擔因為人客消費習慣,生理差真濟,若自本就針對外送服務的店頭影響程度較少,但是無論是外送抑是包轉厝內食,仝款攏愛注意清潔消毒.才會當有效降低病毒的傳染。

全台敬老金大調查

相關新聞