彰化菜市仔推出外送服務 民眾免出門就通買菜

為著防止疫情湠開,佇彰化就有菜市場,推出外送服務,予民眾毋免出門,也會當買著上鮮的菜。

用手機仔掃QR Code、或者是留聯絡方式、然後酒精消毒,才會當入去市場內。這陣國內疫情嚴重,傳統市場為著防疫也實施實聯制,但是市仔內人來來去去,加上出入口濟,落實防疫困難度懸,彰化就有公有市場,捒外送服務,用手機仔通信APP line落訂,新鮮食材直接送去厝內。
 
彰化市公所華陽市場管理員劉淑卿:「一般消費者來傳統市場,是希望直接買新鮮的食材家己轉去厝煮,所以目前有參與這个電商平台的數量,基本上攏有咧成長。」
外送員:「我干焦等下就差不多愛送五張,阮有差不多五六个騎士仔,一个人攏平均有五六張單。」
 
因為疫情關係,袂少餐廳歇睏、民眾減少出門,市場內的肉砧、小食擔仔生意也差真濟,這陣配合外送服務,對收入加減有幫助。
 
攤販:「大賣足可憐,大賣攏無人做,攏歇到六月。」
小食擔仔:「一寡仔人客攏較毋敢出來,所以講生理差一半以上,驚疫情的關係,所以有的人攏會選擇外送的較濟。」
 
一袋一袋整理好勢,有菜蔬、海產佮肉類等等,準備將新鮮的食材送去予人客,佇疫情期間,除了市場改變買賣的方式,也有濟濟農會農民、超市、捒出網路落訂服務,減少人☒人的機會,同時也會當拓展閣較多元的銷售通路。

全台敬老金大調查

相關新聞