看著街友出現，社工人員自動去關心，喙罨有夠無，畢竟全台三級防疫，社工人員最近閣會苦勸街友接受安置，莫閣佇外口拋拋走，因為這馬街友的生活加較困難，各地公園亭仔攏封起來，嘛無地借便所、啉水，高雄市社會局就安排街友來蹛街友中心佮短期旅社。
高雄市社會局社會救助科股長吳芝螢:「兩位街友中心攏是團體管理方式，慣勢自由矣，無佮意予人管理，為著希望阮街友加一寡來蹛、來安置，希望透過旅社，街友嘛會當來蹛。」
最近社會局已經安置31人，街友入來中心蹛進前，會先隔離、檢查身體，遮有食有蹛，毋過猶是有人甘願一个人去蹛旅社，其實台灣疫情緊張了後，社會局就接著袂少街友無掛喙罨的檢舉，有的民眾看著in就親像看著病毒。
街友:「佇我成為正式遊民進前，我嘛會驚遐的遊民，同理心啊，這是心態問題。」
三民街友服務中心社工員陳育廷:「會當看著真濟畫面，攏是街友四四散散，一个人佇遐，in袂特別想欲佮民眾接觸。」
