新竹市頭个社區篩檢站 "正壓採檢亭"保護醫護

新竹市第一座「社區篩檢站」啟用,提供快篩以及PCR,其中PCR檢驗是採用「正壓式採檢亭」,予採檢人員會使「零接觸」高風險者,第一工安排80位隔離、檢疫者與相關接觸史的民眾篩檢。

醫生佇「正壓式採檢亭」內底,佮受採檢的民眾零接觸,避免受著感染,新竹市第一座社區篩檢站,逐工會使篩檢大概80至100人,目前規劃是替居家隔離、檢疫以及捌有相關接觸史的民眾篩檢,未來也會看實際狀況做調整。
 
新竹市長林智堅:「希望會使透過這个方式,會使共閣較濟市內的確診者揣出來,趕緊送去集中檢疫所抑是居家隔離,嘛會使較緊發現,趕緊治療。」

疫情滾絞,真濟民眾開始煩惱家己是毋是受著感染,趕欲去採檢。市政府呼籲,醫療資源有限,著愛先留予有需要的人。
 
新竹市長林智堅:「一定愛照政府相關防疫工課來做,逐家加一份努力,加一份細膩,咱就會使早日共喙罨褪落來,回歸正常生活。」

衛生局嘛提醒採檢的民眾,快篩結果陰性嘛毋是代表絕對無感染著,一定愛隨時注意健康狀況而且落實防疫,若是出現相關症頭,一定愛趕緊閣再做一擺採檢。

全台敬老金大調查

相關新聞