客戶著親身簽名 保險員為防疫望放冗保險法規

最近、防疫的保險單賣佮熱噗噗,毋過嘛有民眾就驚講、保險員四界走、敢會便做防疫的空縫。有保險員表示,因為卡佇法規、有的保險單、是愛本人簽名,其實IN也真驚,希望金管會會當放冗規定。

最近民眾趕買防疫保單抑是其他業務,保險業者收案增加,毋過卡佇保險法相關規範,欲保險、理賠,雙方著愛親見親簽,毋但客戶驚,保險員也驚,攏想盡辦法,減少參客戶面對面的機會
 
保險員林韋丞:「掠準會使像我家己會隨身紮酒精、喙罨,盡量參客戶約佇較開放的空間,親像公園抑是較安全的所在簽約。」

林韋丞講家己是儘量用線頂填寫、來回傳真減少佮客戶面會。因為公司是用平板作業,使用了後,嘛攏會加強消毒。對外界講保險員可能成做防疫的破隙,伊講保險員家己嘛會煩惱感染風險,所以防疫一定照起工,另外一位保險員Return也講,若是新單、抑是有理賠的部份,這馬猶是著親簽,也希望保險法規通佇疫情時期,放較冗的。
 
保險員張睿騰:「我個人當然是希望講E化是一件真好的代誌,其實佇舊年美國,已經有公司就已經攏E化,就是這馬會使買保險,若台灣做這个部份,我感覺是會使,嘛誠好。」

金管會表示,過去因為愛保障民眾的個人資料,才有相關的規範,另外雖然毋是全部的保單,但目前已經有公司有線頂投保,面對疫情嚴峻,目前也當咧佮壽險、產險公司討論,看是毋是先放冗予相關業務用視訊看客戶簽單,疫情後才收件,理賠部份也通用傳真等等,事後才補件,相關配套已經咧研議,上緊後禮拜就會公佈,也通因應四級防疫的可能性。

全台敬老金大調查

相關新聞