地勢坎坷.揣無水源 玉山火燒山5工猶拍袂化 | 公視新聞網 PNN

地勢坎坷.揣無水源 玉山火燒山5工猶拍袂化

玉山國家公園,八通關杜鵑營地附近,5/16發生火燒山,到今已經燒5工矣,目前已經燒57公頃,相關單位也投入五百外人去拍火。煞因為著火的所在較揜貼,而且當咧洘旱,僫揣水源,目前閣無法度控制火勢。

森林防護員當咧開闢防火線,阻擋大火繼續湠,玉山國家公園的八通關杜鵑營地附近,對5月16早時發生火災,到今已經燒了57公頃,但是因為地勢佮天氣的關系,拍火困難。
 
嘉義林管處副處長李定忠:「攏是一寡針葉樹,有油脂,閣有一寡刺柏、玉山箭竹,大家攏知影台灣目前已經洘旱一段時間,塗跤攏真焦燥,拄著火就真僫來打化,閣來高山的所在地勢閣真崎,空氣閣薄,救災人員徛佇一个誠不利的環境。」
 
林管處指出,這擺的火災是因為登山客煮早頓的時陣,無細膩引起的,目前已經動員五百外人去拍火,飛行機的運補佮投水總共飛了47擺,計共投水88噸,但是予燒去的珍貴林木可能損失閣較大。
 
嘉義林管處副處長李定忠:「上源頭的所在伊的林木誠蓊,伊的生態價值誠懸,因為林木燒去 ,伊的水土保持猶閣國土保安的功能,可能嘛會失去,遮的損失真僫估計。」

目前5名引起火燒山的登山客,已經依違反森林法函送地檢署來偵辦,林管處嘛表示,紲落來會針對這擺拍火的成本佮林木的損失,來要求賠償,只是目前上重要的代誌,猶是共火打予化,莫造成閣較大的影響。

相關新聞

留言區