促進疫情資訊推廣 民團推出移工母語翻譯服務

這陣有超過70萬个外籍移工佇臺灣生活。但是面對疫情,in無法度親像臺灣人仝款,隨時收著上新的疫情消息。有一个非營利組織"One-Forty",特別做一个開講機器人。這個機器人,會曉用移工的母語,逐工傳送疫情的消息,希望防疫無分內外,做伙固守疫情。

點開迷眾頁貼文內底的連結,就會使啟用One-Forty Care服務,One-Forty是一个長期關心東南亞移工教育的非營利組織,in佇15推出One-Forty Care服務,提供四種語言的疫情消息,予踮佇台灣的東南亞移工,嘛會使得到上新的疫情資訊。
 
One-Forty共同創辦人陳凱翔:「逐工的中晝佮暗時,阮總共有2擺的推播,所有的資訊其實嘛攏是阮對網路頂頭,透過譬如講疾管署、透過勞動部,其實in嘛有翻譯,一寡東南亞的疫情資訊,阮團隊閣在補足一寡,阮感覺重要但是猶無翻譯過的資訊。」

長期提供外籍移工佮外籍配偶幫助的阮文雄神父講,雖罔中央疫情指揮中心攏會開記者會,但是外籍移工欲仝步得到疫情資訊,是有困難的。

天主教新竹教區越南移工移民辦公室神父阮文雄:「語言吧,因為大部份台灣的新聞攏是用華語,譬如講今仔日差不多兩三點就開記者會,佇台灣開記者會的時陣,In佇咧做工課,In嘛聽無阮佇咧講啥。」

陳凱翔講,到這馬,已經有超過一萬人來使用One-Forty Care的服務;in閣有透過東南亞社群內底的的出名人,來呼籲逐家裝台灣社交距離APP,希望透過這款方式,加強咱的防疫力頭。

全台敬老金大調查

相關新聞