醫護無閒防疫.叫外送閣被拒絕 民眾組隊送食食

這站仔疫情愈來愈嚴重,煞有風聲講一寡病院的醫護人員,欲食飯,叫外送煞予人拒絕。就有民眾發起一个「病院三頓先鋒隊」的計畫,希望照顧醫護人員的腹肚,嘛會使幫助因為疫情,生理受著影響的店家。
 
北市聯醫工會理事長郭蕢瑩:「同事佮阮講,伊無法度叫外送,因為無人欲幫伊送,然後伊也無準備食物,落尾是同事分一半的便當予伊食。」

因為這句話,原底咧做餐飲顧問的宗大筠決定發起「病院三頓先鋒隊」計畫,伊表示,這个計畫希望幫助的毋但醫護人員,猶閣有因為疫情、生理受著影響的食食店頭,提供的服務嘛無收錢。
 
病院外送計畫發起人宗大筠:「阮這擺分做兩个主要計畫,第一个是將你會使家己外送的餐廳,歸類佇外送友善餐廳,另外一个部份是餐廳聯盟,加入餐廳聯盟有幾个重要的條件,譬如講你家己無能力外送,第二个條件是,你必須替阮設計出價數是100箍的便當。」

對地圖就會使看著,青色標誌是外送友善餐廳,是願意家己外送到病院的店頭,這陣差不多有80幾間;黃色標誌是目前當咧準備的餐廳聯盟,是無法度提供外送服務的店頭,但是會使提供食物、予願意出動的民眾外送到病院,差不多有101間。目前願意提供外送服務的民眾,差不多20幾个。宗大筠講,原本18已經有啟動餐廳聯盟的外送計畫,送一寡食食到聯合病院和平院區佮中興院區,毋過目前反應無蓋熱烈。
 
病院外送計畫發起人宗大筠:「阮有淡薄仔親像事實查核,阮一直確認網友送來的訊息,佗一間病院無人願意外送,阮佮每一間病院的社工科,來查證遮的代誌,阮發現一个重要的結論是,事實上這馬雙北地區的病院,阮猶無真嚴重的狀況是醫事人員是枵腹肚的。」
 
宗大筠表示,病院的醫護人員若是有需要,會使透過地圖揣著外送友善餐廳,直接訂外送;目前餐廳聯盟的部分,因為病院的需求猶無真懸,閣佇咧準備的階段,若是病院有需要的時陣,就會來出動。

全台敬老金大調查

相關新聞