遶境無掛喙罨 新港奉天宮紲後活動總停
林緯廷 / 嘉義報導
發布時間：
更新時間：
國內疫情當咧爆開，指揮中心已經限制戶外500人以上活動愛取消矣。毋過新港奉天宮的開台媽祖當咧繞境，有網友也咧檢舉講，in攏無掛喙罨，連tshuā頭的人攏無掛，要求in愛取消活動。奉天宮表示，今仔日的行程行煞了後，就會到遮為止，配合防疫。
嘉義新港奉天宮因為媽袓駐台400週年，5月初10正式舉辦7工6暝的踅境活動，沿路按算欲經過5鄉鎮。但是有網友佇廟方的面冊頂面發現，參加踅境的信眾，閣有人無掛喙罨，要求新港奉天宮要取消踅境活動。
民眾 嚴女士:「 一定愛掛喙罨，無掛袂使，著無。逐家攏愛顧家己的身體，政府欲顧咱按呢遮爾闊，是無可能啦。」
民眾 鄭小姐:「 是感覺一年無辦嘛無要緊，雖然逐家攏對媽祖婆，毋管是奉天宮抑是鎮瀾宮攏仝款，逐家攏真虔誠，毋過疫情是真正足嚴重。」
新港奉天宮董事長 何達煌:「轎無扛入去內底是重點，無入廟。閣來咱扛轎 ，本來扛轎邊仔攏一兩百人，這馬嘛賰七八个佇遐。」
民眾 力小姐:「真正，代誌毋是咱想會著，所以講應該嘛是政府講會當停就停。」
奉天宮表示講，前進有一寡信眾無掛喙罨來參加活動，IN攏有共IN苦勸，嘛有要求轎班陣頭愛做好防疫措施，配合疫情目前的情況，13日下晡5點的行程結束了後，嘛決定欲取消紲落來的行程，配合防疫的措施。
2022杭州亞運 台灣百金之路
