新北圖書館走讀活動 予民眾行過街路認捌歷史

講著賣布的布市,逐家會想著佗位?新北市立圖書館,當咧舉辦地方的走讀活動,tshuā逐家實際行一逝碧華街布市仔,來去行行看看咧。

佇大台北地區若講著欲買布,一般人攏會想著大稻埕的永樂市場,但其實佇三重埔碧華街的布市仔,也有真濟布料通選擇。
 
布商:「就是種類濟,嘛較有特色,就是各種款式,逐國的攏有,有進口的嘛有臺灣的,種類較濟選擇就較濟,價數嘛較適合一般的家庭主婦。」

新北市立圖書館三重東區分館舉辦走讀活動,對碧華布街出發,透過解說、實際拜訪店家,予民眾了解地方的發展歷史。
 
走讀團民眾吳文真:「其實遮的歷史因為足豐富,就像拄才老師有講著豆菜麵,其實阮爸母是對台南搬來三重的,就是台南人攏定定食豆菜麵、豆簽羹。」

布街踅煞,後一个地點來到三重埔的義天宮,義天宮是三重、蘆洲居民的信仰中心之一,這間宮廟上特別的所在就是有真濟貓仔。
 
新北市立圖書館三重東區分館館員 劉淑嬌:「義天宮的特色就是伊有收留散貓仔,逐家有予伊一个封號號作貓廟,因為咱欲逐家有一个讀冊的感覺,就是用行的,用散步的方式來了解地方的特色。」

為著提倡閱讀的多元性,新北市閱讀節用展覽、市集、走讀等等的活動,予民眾感受冊本和生活的關係,今年的走讀活動規劃三十場的路線,包括自然生態、人文風情、在地小點仔等等,向望予民眾用雙跤認捌這片土地,深入了解各地頭的歷史人文。

相關新聞

專題|全台敬老金大調查