年初一位林先生因為上網路買手機仔，資料無張持予詐騙集團偷提去買遊戲點數，變成詐騙人頭，引起警方的注意。民間司法改革基金會佮幾若位律師講，這幾冬有誠濟民眾攏拄著這種狀況，而且去到法院，會閣拄著另一種壓力。
律師黃明展:「彼當時我佇法庭上，參法官辯護的時陣，法官竟然是講這種人頭口座的案件，法院通常90%以上攏判有罪，所以也勸我的被告愛認罪。」
捌替這類被害者辯護的律師黃明展表示，程序上法官應該先要求檢察官舉證，被害人到底敢有犯罪意圖才著，民眾無細膩受騙，並無代表就是詐騙集團，in也舉例，有民眾口座予翁婿借去用，但翁婿求職受騙，落尾法院認定翁婿無罪顛倒借的人有罪，認為法官無徛佇受害者立場，用系統性思考的方式，明顯違反無罪推定的原則。
律師林俊宏:「咱的實務從來毋捌去認定這寡人，為啥物愛提供口座予別人，提供口座予別人，是毋是就有幫助詐欺的故意，是毋是當然就有洗錢的故意。」
司改會認為司法實務上，法官判斷民眾有罪的認定傷過冗，造成真濟弱勢被害者無法度替家己辯護就認罪的冤案。IN也特別準備陳情書，向國家人權委員會陳訴，希望委員會當介入調查過去遮的案件審判的正當性，監察院是表示，會將案件轉交予委員，看紲落來敢欲介入調查。
