外來種侵山林 藝術家斬"山瑞香"染布除害 | 公視新聞網 PNN

外來種侵山林 藝術家斬"山瑞香"染布除害

有一寡外來種進入咱的山林了後,就會破壞咱原本的生態,山瑞香就是其中一種。嘉義縣中埔鄉有在地藝術家,用過分的檳榔子,摻一寡野草來染布,毋但推廣用植物染布的手藝,嘛好通薅掉一寡歹草。

各種用檳榔染的掛布創作,有的頂面閣有畫圖,增加特殊的風格,遮的作品使用的染材,包括過熟的檳榔子、雞屎藤、刺查某等等的植物,甚至閣有使用對環境有害的山瑞香。
 
檳榔染藝術家林書筠:「龍眼的落花閣有檳榔,熟過頭的檳榔,雜草就是山瑞香、刺查某,閣有一寡樹葡萄的皮、蔥頭的皮,遮的物件、遮的雜草濫做伙來染。」
 
嘉義縣中埔鄉的嘉檳文化館舉辦染藝聯展,除了有使用一寡較無仝的染材,閣有來自東興社區的藝術家,希望會當重現過去社區植物染的手藝。
 
藍染藝術家莊曼玲:「我是在地大漢的囡仔,阮知影遮有藍染的技術了後,目前是逐家家己出錢,欲共全部的技術閣學轉來,這馬就是咧做傳承,延續佮推廣的動作。」
 
台灣首府大學助理教授盧炳志:「染這个部份,我感覺是這个所在一个誠大的特色,而且閣有各種無仝形式的文化面出現。」

林務局嘉義林區管理處指出,山瑞香是外來種的植物,已經危害台灣林木將近30年,真濟植物的生長攏受著影響,甚至閣愛編預算來移除。林書筠表示,這馬當咧向社區推廣山瑞香植染,希望透過社區的力量,減少山瑞香的危害。

相關新聞

留言區