70冬前，頭一批政治犯、去予人送去綠島關，有袂少政治犯因為按呢家庭破碎，國家人權博物館今年辦的綠島人權藝術季，以離散和監禁為主題，邀請國內外19位創作者，以文學、影片、藝術品、來回應綠島監獄的過去和現此時。
一幕一幕閃過的畫面，反映白色恐怖時期火燒島的種種模樣，綠島人權藝術季今年第三年舉辦，主題叫假使綠島是一面鏡，主視覺這張相片，就是人權和藝術鬥士歐陽文前輩，佇綠島關12年時翕的。
政治受難者歐陽文女兒歐陽輝美：「苦難攏過去矣，因為阮爸爸彼當陣翕的相，伊攏偷翕，冒生命危險，翕50年代綠島的風情民俗。」
政治受難者楊國宇：「6月18會去綠島，好好仔共遮的故事講予少年人聽，無in少年人對整個歷史無了解啦。」
策展人高俊宏：「臺灣的社會猶原有遮濟小寡仔無公平的所在，猶原有一寡人權的議題存在，這部份阮希望講，過去白色恐怖的歷史，佮今仔日做一个對照。」
計共22件作品，和一系列的藝術工作坊，藝術季對5月中旬開始展四個月，希望綠島成做一面鏡，對照過去和現在人民的生命情境，以藝術為底蒂，再現70冬前的歷史。
