疫情減3成收入 新竹庇護工場豉梅仔開財源

受著疫情衝擊,真濟社福團體的善款攏減少,新竹縣一間庇護工場,對舊年以來,收入落3成,這站仔,in希望用當著時的梅仔,來豉一寡鹹酸甜,幫助in渡過這改的難關。

共醃了三冬梅仔的甕仔拍開,連鞭就鼻著芳味,新竹縣關西這間庇護工場,受著疫情衝擊,人客愈來愈少,餐廳舊年到這馬收入對每個月40幾萬落到30萬,比去落(lak)欲3成。
 
華光社福基金會主任周神助:「對阮影響誠大,因為阮除了產品以外,閣有烘麭的部分。烘麭其實需要去外口義賣,毋過因為疫情的關係,阮真濟所在攏無法度去,按呢就會影響義賣,嘛會影響著阮的收入。」

為著欲增加收入,員工利用四、五月,豉(sīnn)當著時的紫蘇梅仔,閣邀請家屬做伙參加DIY活動,希望社會大眾會使支持予in度過難關。
 
民眾:「逐家互相鬥相共,因為嘛有可能咱家己的厝內,嘛有需要照顧的囡仔,咱照顧別人囡仔的時陣,其實咱的囡仔,嘛是別人當咧照顧。」
 
新竹縣勞工處福利科長劉彥辰:「縣府其實有阮家己優先採購的一个平台,上無阮會佇縣政府內底,會加強推捒遮的產品有偌爾特別。」

雖然講疫情最近繃較絚,毋過員工表示,若是社會各界願意鬥相共,in一定會使度過這个難關。

全台敬老金大調查

相關新聞