長榮航空公司企業工會佇今年3月12，佮長榮公司展開團體協商程序，討論工時等等問題，毋過工會指出，長榮公司佇3月25單方面宣布，5月桃園機場地勤的長短班制度欲來調整，取消短班的制度。工會講，機場地勤的特別休假是以點鐘落去算，平常時的工時有6點鐘短班、佮8點鐘長班的差別；以三工特休來講，會產生24點鐘的特休，24點鐘若是攏請短班、會使得著4工的休假，但是這馬長榮共短班取消、賰長班，會只賰3工的休假，這个改變影響著1000人左右。
長榮航空企業工會秘書黃士庭：「長榮航空公司無應該嘛袂使佇阮送出協商了後，就單方面，無經過任何團體協約的討論，直接改變阮欲申請協商的代誌。勞動部敢會使表態，長榮航空這種作法有問題是算不當勞動行為。」
勞動部裁決科科長章鴻年：「阮一定愛調查，伊是毋是佮你講的仝款，若仝款，當然就是違反程序協商，這是阮需要的。」
工會表示，受疫情影響公司有經營壓力，工會是願意佮公司來討論因應對策，但是希望公司先共制度改轉去
長榮航空企業工會理事長蔡勝旭：「公司應該愛調轉去原本的長短班工時制度，才來以整體的狀況討論。譬如講，公司今仔日感覺真正有成本上的考慮，你提出成本的數據，咱才來依規个環境的考量來做討論，一个勞資攏會使承擔的模式。」
長榮航空公司表示，短班較捷出現加班的情形，固定8點鐘的長班是會使予員工較穩定的工作時間。而且對2018年開始，就有咧沓沓仔取消短班的制度，而且過程當中嘛有宣導，工會是佇今年才提出團體協商，阻擋調整進度，長榮批評，工會這是咧抹烏公司。
