嘉縣設寵物認養推廣示範公園 打造友善動物環境

為著欲解決嘉義縣流浪貓仔狗仔的問題,嘉義縣佇山區的新港佮海線的朴子,成立「寵物認養推廣示範公園」,縣政府講,寵物公園全臺灣已經有40搭,目前干焦嘉義縣有提供認養協助,希望透過對寵物友善的環境,提升寵物認養的成果。

主人家己的狗仔,佇公園內底耍,這个專門替寵物打造的設施,邊仔閣有網仔圍牢(tiâu),嘉義縣用農委會的補助,佇海區的朴子佮山區的新港,攏設立寵物認養推廣示範公園。

嘉義縣佇咧較遠的山區猶是海區,有當時會傳出流浪狗逐人發生意外,猶是流浪貓狗受傷需要救援的消息,雖然透過相關單位的努力,前兩冬流浪貓狗的絕育量已經超過一萬隻,縣政府表示,欲改進這个問題,民眾的教育真重要。

嘉義縣動物防治所為著欲鼓勵流浪動物認養,推出誠豐富的福利條件,今年到今也已經協助完成325隻流浪動物的認養。猶毋過有發現誠濟所在的流浪貓狗是掠了以後又閣出現,懷疑可能是有人對別位載來放,已經開始做調查,欲來阻擋這款虐待動物的行為。
 

全台敬老金大調查

相關新聞