臺灣引進外籍移工30外冬，這陣國內有超過71萬位移工，這馬有民間團體邀請移工用母語寫文章，請臺灣的學生翻做華語、社區大學學生配圖、做藝術品，希望透過眾人的努力，將移工生活的跤跡記錄落來。

用印尼話共這篇家己寫的號做「思念」的詩讀出來，十一冬前印尼籍的Mut，經過印尼排華事件後，來台灣做家庭看護工重新過日，伊也講出離鄉背井來台灣討食，佳哉有行動的權利和自由。

思念故鄉的心情，透過文字，將伊變做奮鬥的能量，菲律賓籍的家庭看護工ROSE，佇台灣做工課七冬，已經靠雙手佇菲律賓有家己的厝，予伊的囡仔有實踐夢想的所在。

13位對越南、印尼、菲律賓來的移工，用母語寫文章，台大社工系學生鬥翻做華文，永和社區大學的畫圖班學員才閣將in的心情畫出來，就望移工的故事會當佇台灣有閣較濟連結。

台灣引進移工三十外冬，這陣國內有超過71萬外个移工，透過這款的工作坊，移工有分享和創作的機會，也予人看著in毋干焦是咱重要的勞動力，嘛是台灣社會的一份子，共同咧促進社會進步。