臺南見清朝糖漏燒瓷遺跡 文資處會勘列冊追蹤

臺南歸仁的文史工作者,佇歸仁、關廟隔界的所在發現真濟粗瓷片,懷疑是糖漏窯的遺跡。文化局會同地方人士做伙去現場會勘,要求這个所在先列冊追蹤,地主暫時袂使動工,等待進一步的調查。

關廟保東橋邊仔的塗堆,詳細看會發見遮四界攏是粗瓷的碎片,而且數量真濟,地方人士認為,出塗的粗瓷片,攏是清代製糖用的糖漏。地主懷疑,是予人烏白擲佇遮。

到底是本來就掩佇塗內底,抑是人提來擲佇遮,發現這堆糖漏的徐世和,其實佇附近的竹林仔閣發現一个窯。

徐世和是在地人,嘛是退休老師,伊講伊其實佇二十幾冬前,就發現這个所在,因為藏佇竹林仔內底,攏無公開,是最近看著有怪手咧整地,瓷仔片攏出塗矣,伊才趕緊請人通報文化局來勘查。現場的民代、退休老師攏希望會當維護佮保留。

其實歸仁地區進前捌發現十三窯遺跡,煞沓沓仔消失,這擺閣發現新的文化遺跡,表示歸仁地區會當連結台灣的製糖產業歷史,文資處表示會向文化部爭取經費,進一步調查,請地主佇一冬內暫時袂開發。

全台敬老金大調查

相關新聞