四技二專甄選看重一般學科 不利高職學生

108課綱向望每一个囡仔,攏會當接收著,上適合家己的教育。毋過全國教師工會總聯合會今仔日表示,目前,技術專科院校的招考制度,可能無符合這个課綱的本意,是因為四技二專的甄選入學制度,較看重一般科目,專業科目強、一般科目較弱的囡仔,可能會較不利。

2019年實施的「108課綱」,以「成就每一个囡仔」為主題,向望為囡仔揣著適合的教育,但是全國教師工會總聯合會指出,現行的考試制度,可能是無符合這个初衷。

全教總講,四技二專甄選入學第一階段愛看統測的成績,科目有國文、英文、數學、佮兩科專業,每一科滿分攏仝款15分,比較之下,專業科目的干焦佔五分之二,一般學科煞佔五分之三。

全教總講,甄選入學是技術型高中學生升學的重要管道,差不多佔整體的一半,111年技術型高中考試制度若是仝款按呢,可能造成技術型高中的老師顛倒看重一般科目。

教育部回應,技術型高中的學生除了甄選入學以外,猶有其他免看統測成績的升學管道通選擇。針對111年考試制度,教育部已經要求相關單位愛佮學校、猶有相關團體來研究,向看重專業科目的方向來討論。

全台敬老金大調查

相關新聞