臺南古城節今日起鼓 重現往過沿路喝賣情景 | 公視新聞網 PNN

臺南古城節今日起鼓 重現往過沿路喝賣情景

今仔日佇臺南市區充滿古早味。有古早喝賣的場景,誠鬧熱,這是臺南古城節活動,連臺南府城隍廟3百斤重的大算盤,嘛扛出來遊街。

踅街陣頭上頭前,是差不多一个人身懸,三百斤重的大算盤,著愛四五人捒咧行,上趣味的是綴佇後壁的擔仔。

聽著這个聲,就想著古早的芋冰,閣有喝玲瓏賣雜細的擔仔、廣告車、擔仔麵,攏總20台擔仔做伙遊街喝賣。

毋但有擔仔車隊,忠義國小的學生兩人一組,將虎爺的藝術浮雕扛轎踅街,囡仔都感覺蓋心適。原底囥佇臺灣府城隍廟內底,城隍爺的大算盤,嘛罕得捒出來踅街。

今年的臺南古城節,主題是臺南的聲音,所以除了擔仔喝賣,嘛有市仔、民謠等等,攏是臺南人記持的聲音,若親像轉去古城美好的彼个年代。
 
 

留言區