新竹縣設教育科技中心 培養學生應用生活科技 | 公視新聞網 PNN

新竹縣設教育科技中心 培養學生應用生活科技

新竹縣今年成立教育科技中心,欲帶動偏鄉的科技教育。內底有濟濟款的電動工具、材料,會使予學生囝仔,現場來摸、來做、來體驗。予科技結合生活。

利用光源,車完全毋免插電就會使振動。另外一爿閣有學生用雷射機械,刻出家己設計出的圖樣。教育科技中心提供的上課內容,學生攏真有興趣。
 
學生表示:「較早攏是課程內底看著,就是平面的,這馬有科技中心,就會使實際親手去操作,對以後的手做能力,參操作機械能力嘛有提升 。」學生表示:「對木工抑是3D列印有興趣,會使較捷接觸,大漢了後有閣較濟的選擇。」
 
新竹市光復高中電子科主任謝其杰表示:「會使揣著國中學習的生科,抑是資科技能,其實對未來多元智能開發這部分的啟能。」

為著欲培養學生應用生活科技,新竹縣今年特別打造教育科技中心,將科技帶入去課程佮生活中,希望科技教育會當對細漢時就開始學。
 
新竹縣教育處副處長蔡淑貞表示:「未來生科課程內底,會當更加生活化,將生活帶入課程內底,予學生更加愛學習手做,閣較有興趣,學習各方面的智能。」
 
教育處表示,科技中心毋但會當幫助學生佇上課中實際動手操作,嘛希望學生對課程內底提升解決問題的能力,而且對科技產生興趣,未來發展出家己的專長。

相關新聞

留言區