無落雨致蓮池潭欠水 連龍虎塔基座攏看現現 | 公視新聞網 PNN

無落雨致蓮池潭欠水 連龍虎塔基座攏看現現

中南部欠水無落雨,高雄左營最近有遊客發見,蓮池潭有一部份的湖底已經焦涸涸,出名的龍虎塔下底的柱下石攏看會著,當地民眾講,從來毋捌看過這種狀況,佳哉潭中央閣有水,趨水佮扒龍船的活動暫時無受影響。

這馬來到左營蓮池潭,滿滿的蓮花開了真媠,毋過看詳細會驚一趒,出名的龍虎塔倚潭邊仔的所在已經見底矣,草仔發甲規片,鴨仔行佇水底四界討食,原底藏佇水內的橋墩佮龍虎塔的基座,攏看會著,有人講伊是第一擺看著這隻龍的跤,原來是這種模樣。
 
遊客:「水應該浮佇龍佮虎跤的所在,就是這馬規个柱下石都出來,感覺有一寡,翕相看起來怪怪的。」
 
當地民眾:「捌啦,無遮厲害有影啦,舊年就無落雨,較厲害,無,無遮厲害。」
 
毋但遊客感覺奇怪,當地民眾講,雖然以前嘛有拄著洘旱的狀況,毋過攏無遮嚴重,in嘛煩惱蓮池潭無水無遊客,in就無生理通做,蓮池潭的水主要是靠雨水,因為高雄真久無落雨,規个潭水水位下降有一米,賰中央閣有水,會當耍趨水活動。
 
樂園業者鄭萬生:「中央水位是上蓋深的所在,大概上較深的所在,攏有兩米至兩米半左右,因為這馬欠水關係,這馬水位影響差不多,差應該有一米左右,毋過針對阮的水上活動,目前猶是無影響。」
 
蓮池潭趨水活動,天氣愈燒熱生理愈好,這馬業者猶無講蓋煩惱,另外扒龍船的訓練暫時嘛無影響,毋過逐家攏向望天公伯鬥相共,趕緊落雨,解除欠水的問題。

相關新聞

留言區