第五屆健保會委員名單公佈 猶原無基層醫護 | 公視新聞網 PNN

第五屆健保會委員名單公佈 猶原無基層醫護

第五屆健保會委員名單,佇4/9公佈。毋過醫事聯盟團體就批評,這份名單佮較早來比,是攏無啥改變,仝款無基層的人員來參與。聯盟講,這馬會開始推動修法,來改變萬年健保會的狀況。

今年二月,醫療產業相關工會去健保署陳情,希望改變每屆名單的攏相siāng的萬年健保會,而且予基層醫護人員嘛有參與健保會的機會,彼時陣健保署長李伯璋表示,會向衛福部反映遮的意見,就會有改變的機會。
 
毋過最近新的健保會委員名單公布,醫事聯盟團體批評這份名單猶是換湯無換藥。

7千5百億的健保預算是由健保會來決定欲按怎開,聯盟表示,名單內底大部份是資方佮政府代表,基層的聲音猶原攏無法度入去到健保會,醫護環境對基層來講是愈來愈血汗、醫療品質就會愈來愈䆀。in已經連紲兩屆來共衛服部講這件代誌,但是一直攏無得著解決。

聯盟有提出修法草案,內容包括健保會的會議愛開放旁聽佮採訪,組成的委員嘛應該由行政院長提名、佮立法院同意,而且比照立法委員做每年的財產申報。聯盟表示,會揣相關立委來合作推動修法,來改變萬年健保會的狀況。健保會方面,記者截稿進前,一直無法度連絡著負責人、了解in的回應。

相關新聞

留言區