鳥仔岫內底，有一隻鳥仔囝的正跤，予喙罨的糾帶綁牢，鳥仔囝行來行去，另外一爿的糾帶，嘛勾著樹枝，屏東科技大學的研究人員，看著影像攏驚一趒。
屏科大鳥類生態研究室人員，佇山區揣著這個bā-hioh岫，IN搝電線、利用長鏡頭，對頂個月19開始直播bā-hioh爸母飼兩隻鳥仔囝的過程，發現IN足愛抾物件轉來鳥岫，連清明培墓的硩墓紙嘛抾轉來。
其實佇直播進前，捌發生樹仔跤有人培墓，火燒起來，差一點仔燒著鳥岫的意外，佳哉拍火了後，四隻鳥仔攏平安，這是全台頭一擺bā-hioh飼囝直播，已經有15萬人次來看，經過這兩禮拜，逐家看著IN一家伙仔的生活，看著鳥仔囝那來那大漢，嘛更加了解bā-hioh的生態。
