苗栗分區限水影響新竹465戶 今設臨時供水站

水情愈來愈食力,臺中、苗栗初六開始實施「送水5工、停2工」的限水措施。新竹也有部分地區是用苗栗的水,這馬大概有465戶受著影響。縣市政府透早就攢好臨時供水站,予欠水的民眾,有水通好用。

連鞭就欲停水矣,民眾趕緊共寶貴的水,留落來儉儉仔用,水情食力,台中苗栗今仔日已經開始分區停水,過去食水食苗栗水庫的新竹縣市部份地區,這馬嘛著愛開始限水矣。

這改新竹地區受停水影響的,除了新竹市有兩个里,閣有新竹縣寶山鄉的寶斗里,自來水公司一透早,嘛派人佮鄉公所做伙提醒民眾,停水的時間。

為著減輕民眾無水通用的不便,停水範圍附近嘛有設緊急的供水點,逐工早起八點到暗時八點,提供有需要的民眾取用,猶毋過嘛是著提醒民眾,洘旱時期,更加需要全民撙節用水。
 

全台敬老金大調查

相關新聞