臺南新化老街百冬歷史 用"樂土"修補古厝妝娗

臺南新化老街,舊年拄好一百年,老街西爿目前有18間厝的厝主,同意文化局的整修計畫,修復牌樓厝的外觀佮亭仔跤。上特別的是,師傅是用水庫內底的塗沙,一種號做「樂土」的新材料,咱做伙來看覓。

徛佇鷹架頂,牌樓厝頂面的花飾,看共足清楚,師傅當咧用樂土,修補必巡。

為著共古厝上有價值的花飾修復,師傅第一擺用樂土這種新工法,第一批6間古厝過年進前已經完成,毋但加強建築外觀,拆掉看板,亭仔跤的厝頂佮老店店號,嘛攏愛整修。

這間欲一百五十年歷史的米店店號,原底藏佇鐵門內底足濟冬,這馬總算會當重現,厝主楊太太足感動的。新化老街,因為攏是私人有歷史價值的古厝,負責整修的團隊開三、四冬的時間,一戶一戶共厝主溝通,閣共老相片揣出來,比對古厝原底的模樣。

新化老街佇1920年的時陣,規个中正路改建做2樓抑是3樓的牌樓厝,到今過一百冬,每一間店面攏有故事,這是台南第一批遐爾濟間連棟古厝整修的案例,希望予閣較濟人看著遮爾媠的百年古厝。

九合一選戰解析

相關新聞