潮州市區這間民宿看起來真四序，遮閣有專門予爸母tshuā囡仔來蹛的親子房，頭家就是這對翁仔某，四冬前翁婿辭掉南科的頭路，才tshuā牽手轉來故鄉創業。
張淑如是高雄人，伊綴翁婿經營民宿，嘛看著這幾冬潮州的發展。
轉來故鄉潮州定居的閣有伊，梁蜀玲本底嫁去中部，伊佇七冬前轉來接手老爸的餐廳，後來in翁嘛做伙搬轉來潮州蹛。
那來那濟北漂的青年轉來，所以這馬佇潮州，透天厝一間一間起，閣有袂少公共建設，觀光旅客嘛變濟，雖然屏東各鄉鎮人口一直落，潮州的戶數煞增加，舊年出生的紅嬰仔嘛較濟，潮州攏維持佇5萬4千人。
王建元認為，潮州厝價雖然有起，猶是比高雄市、屏東市俗，上重要是交通利便，民間願意投資，自然吸引少年人來定居，所以這馬縣府爭取高鐵延伸，嘛是希望交通利便，會當搶救屏東人口的問題。
少子化趨勢之下，地方攏咧拚搶人，學者建議中央愛用行政院的懸度，成立專門辦公室，整合各部會，解決台灣目前的人口危機。
