家事服務法無進展 看護工規日操薪水少.無保障

根據調查，有袂少看護逐個月領萬七左右，毋過工作時間是規工24點鐘、攏著隨時看顧，有人甚至做三年，攏毋捌歇假。這寡家事移工的勞動權益、無受勞基法保障。2004年勞團推捒家事服務法，毋過因為頭家辛勞撨袂好勢，到今猶無進展。

Miya 捒阿媽拄對公園散步轉來，入門了後，Miya先替阿嬤徙位，予伊佇眠床歇一下，伊才閣去款厝內。
今年的基本工資已經起到逐個月2萬3800，不過家事移工猶原予人排除。根據勞動部統計，全台灣有24萬外个社福移工，印尼籍占七成，服務至少23萬个失能家庭，看護工不管睏抑食，24點鐘攏和伊照顧的人做伙，做工課的時間長，袂使凊彩換頭家，加上勞動條件無受勞基法保障，自按呢三不五時就聽講有移工落跑，私底下揣較有利頭的工課。

根據移民署的統計，這陣失去聯絡的移工濟共五萬一千外人，其中以看護工兩萬八千外人上濟，勞團佇2004年頭擺向立法院提出「家事服務法」草案，要求至少予移工有相連紲11點鐘的歇睏時間，照勞基法七休一，基本工資嘛愛和台灣勞工仝款，欲倚兩萬四，不過勞動部坦白講，欲捒專法，難度懸。

勞動部嘛講，國內弱勢失能者家庭雇主的負擔能力，嘛著愛考慮；未來除了加強落實雇主倩移工進前著參與講習，也會參移工來源國的政府檢討薪水和勞動條件，in也望長期照顧制度有閣較完善的配套措施。