落跑移工囝兒無國籍保障 怎安置.救助受質疑

根據移民署的統計,有身的或者是有tshua6囡仔的失聯移工,平均逐年就有400人,遮个囡仔若予內政部認定是無國籍,經過咱的社會機構申請歸化,未來就有機會成做台灣人,不過遮的囡仔的安置和救助的合法性,猶原受外界質疑,來看咱的專題報導。

佇台灣出世,一歲八個月大的George是這位印尼籍媽媽的寶貝仔囝,為著囡仔的未來設想,伊佇舊年底決定去移民署自首,結束五冬外和警察覕(bih)相揣的日子。

2015年George的媽媽拄來台灣,佇屏東做家事看護,照顧一位阿公,原本想講是趁錢的好機會,想袂到煞是惡夢的開始。

做8個月的看護,毋但毋捌歇過假,George媽媽閣講。

向仲介和雇主反映,攏無得著友善的回應,George媽媽姑不而將,就按呢落跑,成做非法的失聯移工,台北、台中、南投四界去,替人包過水餃、挽過茶、做過工廠穡頭,薪水攏比看護工的萬七較濟。

像George媽媽按呢,因為勞動條件欠缺,失去合法移工身份,毋是個案,根據移民署的統計,對工課場逃走,有身的或者是有tshuā囡仔的移工,平均逐年就有400位。

落跑移工所生的囡仔,無健保、無身份,和合法移工所生的囡仔,享有和台灣人仝款福利的運命完全無仝,不過遮的非本國籍的囡仔欲何去何從,安置和救助的資源等權利,猶原等待處理。

全台敬老金大調查

相關新聞