新竹樂齡中心辦臺語課程 望序大食到老學到老
張君豪 / 新竹報導
發布時間：
更新時間：
人講食到老學到老，一點仔嘛無毋著，新竹有一間樂齡健康中心，推出趣味的臺語課程，老大人佇遮唱歌仔戲、學諺語，內容豐富閣趣味。
學員大聲唱歌真歡喜，每一个人攏真好笑神。
除了唱歌，閣有趣味的活動通好耍，序大用這款方式來學台語，感覺一點仔嘛袂困難。
台語老師佇臺頂唱歌仔戲，那唱那比動作，學員嘛綴咧做伙唱，新竹這間安養中心的台語課程，平常時閣會舉辦活動，學員直接穿戲服來學唱歌仔戲。
經過學習，學員這馬每一个人的台語攏講甲真輾轉，問遮的序大為啥物想欲學台語，真濟人攏講，會使對學習的過程，揣著講台語趣味的所在。
