境外生入境厚手續 呼籲政府放冗檢疫標準

臺灣佮帛琉的旅遊氣泡計畫連鞭欲起行,毋過對仝款是低風險的澳門,抑是其他國家,咱臺灣猶是無放冗檢疫標準。境外生權益小組3/25開記者會,希望臺灣政府會當鬥相共,予遮的所在的境外生方便入境。

境外生權益小組25開記者會,點出三項境外生佇疫情期間,捷拄著的問題。in希望臺灣政府對風險較低的地區、放冗檢疫的標準,親像澳門就是一个例。

權益小組表示,自疫情爆發以來,入境的程序變真複雜,而且檢疫隔離時間長閣真開錢,有濟濟境外生已經一冬無轉去in的國家,希望臺灣政府會當鬥相共。

指揮中心指揮官陳時中佇24的記者會表示,會先觀察人數、閣再研究看覓。權益小組表示,到3月20為止,澳門已經相連紲365工無本土病例;臺灣願意規劃帛琉、新加坡的旅遊氣泡計畫,煞一直無放冗對澳門的規範,in實在是無法度理解。

全台敬老金大調查

相關新聞