成大望臺語台徙到臺南? 臺語台:目前無計劃

臺南市幾若个民間團體佇今仔日召開記者會,呼籲公視臺語台的總部,愛徙去成功大學,結合在地的學術佮文化優勢,進行產業佮學術的合作。臺語台表示,目前無總部徙落南的計畫,毋過有咧規劃欲籌備南部製作中心,南部的地點,也攏有咧考慮當中。

台南市議員佮台文界的代表喝口號,邀請公視臺語台共總部徙岫來台南。成功大學台文系教授蔣為文表示,台南會當講是台語文化的首都,公視臺語台的總部徙來台南,對推動國家語言的發展有真大的幫贊。

受邀請前來的台語文學團體代表,攏認為台南是全國發展台語文化上久的所在,臺語台總部佇台南設立,會當提升台語文化的保存佮發展。台南市文化局嘛指出,進前市府就有邀請公視落南來會勘,這馬成大也願意提供土地,相信無其他城市條件會比台南閣較好。

台南各界殷切期待,毋過公視臺語台表示,總部南遷,毋是臺語台單方面會當決定的代誌。

雖然猶無南遷的規劃,毋過臺語台佇台北開台了後,接著真濟南部民眾反映,講較罕得有機會、嘛較無方便,上北參加節目錄影。臺語台已經爭取著2000萬預算,籌備南部製作中心。地點包括台南、高雄、嘉義,攏納入考慮,猶未決定。

相關新聞

專題|全台敬老金大調查