吳逸民得學術獎 研發"P波警報"提早發地動警示

教育部今仔日頒發,國家講座主持人、國家產學大師和學術獎。今年學術獎著獎者當中,臺大地質系吳逸民教授,所研發的「P波警報器」,會當佇大地動發生進前5秒至8秒,發出警告,毋但佇臺灣已經當咧使用,進嘛推廣到有地動風險的國家。

台灣位佇環太平洋地動帶,捷發生地動,台灣大學地質科學的吳逸民教授研發出會當提早預警的「P波警報系統」,毋但佇台灣的中小學、科學園區、捷運有廣泛的應用,嘛輸出到世界各國。

另外佇國際誠出名的腦科學研究專家江安世教授,伊佮團隊發表的「果子蠅全腦神經網路圖譜」,透過透明的組織來看基因的表現,對大腦的運作研究有真大的幫贊。

擔任頒獎人的總統蔡英文指出, 對新冠肺炎的疫情爆發,到研發疫苗,相信逐家攏會當感受著研究者對世界的重要性和貢獻,立院法嘛當咧審議教育對產學合作提出的創新條例草案,希望透過企業資源擴大學校的研發能量

今年國家講座主持人獎攏總有7位得獎人、國家產學大師有3位得獎人、有10位學術獎的得獎人,分別佇人文藝術、數學佮自然科學、生物、工程應用等等無仝的領域有豐富的研究。蔡英文嘛講,做研究是一條真辛苦的路,政府會繼續努力,予每一位研究者閣較濟的支持。

相關新聞

專題|全台敬老金大調查